Salute!
In ti-ci gemlog (quam blogs es nominat in li Gemini-spacie) yo vole partir quelc pensas pri diversi coses. Yo presenta les in ti forme, proque it permisse expander pensas mult plu bon quam es possibil in medies social (pri queles yo have, in céteri, un opinion desfavorabil). Adplu, secun mi saventie, presentmen nequi scri plu long articules in Occidental. Yo vole remediar to e fórsan inspirar altres far lu sam in li Gemini-spacie.
Quo es Gemini?
Gemini[1][2][3] es un ancor nov internet-protocol, quel contrasta li protocol dominant de HTTP. Li scope de Gemini es atinger un max bon beneficie con un complexitá minimal e simultanmen asecurar un bon protection del sfere privat — dunc quasi li oposite de HTTP e su navigatores, queles es totmen for del control[4] e completmen dominat de quelc corporationes[5].
Pro tis rasones, Gemini oferta un mult plu modest, ma anc mult plu plesent experientie con un pur focus sur contenete sin distractiones. Por navigar in li Gemini-spacie yo recomenda Lagrange[6].
4 Drew DeVault: The reckless, infinite scope of web browsers
5 Youtube: Where Did the Rest of the Internet Go?
Source