Mallonga deklaro pri AI

Estas multe da parolado pri maŝinolernaj modeloj kaj genera AI lastatempe. Al kiu mi ne kontribuos ĉi tie. Mi volas tamen sciigi mian sintenon pri la tuta afero kaj mian politikon por ĉi-retejo, okaze se ĝi gravas por iu.

Mi ne havas fortajn sentojn rilate la teĥnologion mem, mi ja pensas, ke maŝina lernado havas multe da iteresaj uzoj. Teorie. Mi ja trovas la nunan praktikon fia. La strebo altrudi GLM-bazitajn ilojn al ĉiu kaj enŝovi ilin en ĉion, senrigarde la koston al ekologio, socio kaj homa digno estas abomena. Mi ŝatus vidi ian moratorion pri industria uzo de tiaj ĉi teĥnologioj por jardeko aŭ du, kvankam, kompreneble, nenio tia okazos.

Iel ajn, tiu ĉi retejo estas *mia*, do nenio, kion mi metas ĉi tien, estas kreita, tradukita aŭ alie kunverkita de tiel nomata AI. Ĉiuj tekstoj, tradukoj, eraroj kaj miskomprenoj estas miaj. Kiam mi citas aŭ alie uzas verkojn de aliaj homoj, mi indikas tion. Ĉiu ebla misuzo estas mia respondeco.